អាថ៌កំបាំងរបស់ Sir Alex នៅក្រុមបិសាចក្រហមត្រូវបានគាស់កកាយក្នុងសៀវភៅស្វ័យជីវប្រវត្តិ
អាថ៌កំបាំងជាច្រើនក្នុងអាជីពដឹកនាំរបស់លោក Sir Alex Ferguson នៅក្រុមបិសាចក្រហម Manchester United ត្រូវបានគាស់កកាយឱ្យសាធារណជនបានដឹងក្នុងសៀវភៅស្វ័យជីវប្រវត្តិដែលសម្ពោធជាផ្លូវការម្សិលមិញ។
អត្ថបទ៖ សំណល់ស្ករកៅស៊ូចុងក្រោយរបស់ Sir Alex ដាក់ដេញថ្លៃ
ក្នុងសៀវភៅស្វ័យជីវប្រវត្តិនោះ លោក Sir Alex បានរិះគន់អតីតកីឡាកររបស់លោកមួយចំនួនដូចជា David Beckham, Roy Keane ក៏ដូចជា Anderson និង Carlos Tevez តែក៏មានការសរសើរដែរ នោះគឺសរសើរ Cristiano Ronaldo។
អត្ថបទ៖ Sir Alex និង Bale ឈ្នះពានអ្នកចាត់ការ និងកីឡាករល្អបំផុតប្រចាំរដូវកាល
ចំពោះ David Beckham លោក Sir Alex រៀបរាប់ថាអតីតខ្សែបម្រើដែលដុះដាលចេញពីថ្នាលយុវជនរបស់ក្លិបបិសាចក្រហមម្នាក់នេះចាប់ផ្ដើមឈ្លក់វង្វេងនឹងកេរ្តិ៍ឈ្មោះ ហើយបាត់បង់ការផ្ដោតអារម្មណ៍ក្នុងការលេងបាល់នៅចុងទសវត្សទី៩០ ជាពិសេសក្រោយពេលរៀបការជាមួយតារាចម្រៀងប៉ុប Victoria Adams ក្នុងឆ្នាំ១៩៩៩រួច ការគិតរបស់គេបានប្រែប្រួលទាំងស្រុង។ “បញ្ហាធំសម្រាប់ខ្ញុំគឺថាគេ (Beckham) បានលង់ស្នេហ៍ Victoria។ ការលង់ស្នេហ៍នោះបានផ្លាស់ប្ដូរអ្វីៗគ្រប់យ៉ាង។ គេជាកីឡាករដែលខ្ញុំបង្វឹកតែម្នាក់គត់ដែលចង់ល្បីទាំងក្នុងបាល់ទាត់និងទាំងជីវិតឯកជន”។ លោក Sir Alex បញ្ជាក់។ លោកបន្តថាការដែលលោកសម្រេចចិត្តលក់ Beckham ទៅឱ្យ Real Madrid គឺបន្ទាប់ពីមានរឿងរ៉ាវក្នុងខែកុម្ភៈឆ្នាំ២០០៣ ក្នុងថ្ងៃដែល Man Utd ប្រកួតចាញ់ Arsenal ក្នុងពានរង្វាន់ FA Cup នៅលើទឹកដីខ្លួនឯង។ ពេលនោះលោកមួម៉ៅយ៉ាងខ្លាំង ហើយបានទាត់ការ៉ាមប៉ុងក្នុងបន្ទប់ផ្លាស់សម្លៀកបំពាក់ហោះទៅចំចិញ្ចើមរបស់ Beckham ដោយចៃដន្យ។ ប៉ុន្តែអ្នកចាត់ការដែលល្បីល្បាញខាងមិនចេះទ្រកីឡាកររូបនេះ មិនបានសូមទោស Beckham ឬនិយាយអ្វីដើម្បីសម្រាលស្ថានការណ៍ឡើយ ហើយមួយថ្ងៃបន្ទាប់មក រឿងរ៉ាវនេះបានលេចឡើងក្នុងសារព័ត៌មាន។
អត្ថបទ៖ ទិដ្ឋភាពដ៏រំជួលចិត្តនៅ Old Trafford យប់មិញ
បុរសដែលធ្វើជាគ្រូបង្វឹកនៅក្រុម St. Mirren, Aberdeen និងក្រុមជម្រើសជាតិស្កុតឡែន មុនពេលផ្លាស់មក Old Trafford បញ្ជាក់ច្បាស់ថា៖ “អំឡុងពេលនោះ ខ្ញុំបានប្រាប់ទៅថ្នាក់គ្រប់គ្រងក្លិបថា David (Beckham) ត្រូវចាកចេញពីក្លិប។ នៅពេលណាដែលកីឡាកររបស់ក្រុម Manchester United ណាម្នាក់ឡើងចាងធំជាងអ្នកចាត់ការ កីឡាកររូបនោះត្រូវតែចាកចេញពីក្លិប។ នោះជាការព្រមានចុងក្រោយនៃអាជីពរបស់គេនៅ Old Trafford”។
ចំណែកឯ Roy Keane វិញ អតីតអ្នកចាត់ការដែលដឹកនាំក្រុមបិសាចក្រហមពីឆ្នាំ១៩៨៦ដល់២០១៣ បង្ហើបថា លោកបានប្រាប់ឱ្យអតីតប្រធានក្រុមរបស់ក្លិបរូបនេះ ចាកចេញពីក្លិប ក្រោយពេលរូបគេប្រើពាក្យសម្ដីធ្ងន់ៗរិះគន់មិត្តរួមក្រុម ដូចជា Kieran Richardson, John O’Shea, Darren Fletcher និង Rio Ferdinand ក្នុងបទសម្ភាសន៍មួយជាមួយទូរទស្សន៍របស់ក្លិប (MUTV) ក្នុងឆ្នាំ២០១៥។ រឿងនោះហើយដែលបណ្ដាលឱ្យទំនាក់ទំនងរបស់លោក ជាមួយ Keane បាត់បង់និងស្ដារលែងឡើងរហូតមកទល់បច្ចុប្បន្ននេះ។
Wayne Rooney ត្រូវបានលោក Sir Alex បរិយាយក្នុងសៀវភៅដែលនឹងចេញលក់ជាផ្លូវការនៅថ្ងៃព្រហស្បតិ៍ស្អែកក្នុងតម្លៃ២៥ផោន (៤០,៥ដុល្លារ) ថាខ្សែប្រយុទ្ធរូបនេះបានសូមចាកចេញពីក្លិប២លើករួចមកហើយ ដោយលើកទី១ក្នុងឆ្នាំ២០១០ និងលើកទី២កាលពីខែឧសភាឆ្នាំ២០១៣ថ្មីៗនេះ។ លោក Sir Alex បញ្ចេញការសម្ងាត់ថា ពេល Rooney សូមចាកចេញលើកទី១នោះ គឺដោយសាររូបគេបារម្ភពីមហិច្ឆតារបស់ក្លិប Man Utd និងបានជំរុញលោកឱ្យទិញខ្សែបម្រើប្រយុទ្ធជម្រើសជាតិអាល្លឺម៉ង់ Mesut Ozil ដែលផ្ទេរពី Werder Bremen ទៅ Real Madrid យកមករួមក្រុម។ ពេលនោះ លោកក៏តបទៅ Rooney វិញថាវាមិនមែនជាការងាររបស់អ្នកទេក្នុងការសម្រេចចិត្តថាគួរទិញអ្នកណាមករួមក្រុម។ ការងាររបស់អ្នកគឺប្រឹងលេងឱ្យបានល្អដើម្បីជួយក្រុម។ រីឯមូលហេតុនៃការសូមផ្លាស់ក្លិបជាលើកទី២ គឺដោយសារគេ (Rooney) ហាក់នឿយណាយនឹងការប្រកួតក្នុងមួយរយៈពេលចុងក្រោយ ហើយអត់សប្បាយចិត្តដោយសារអត់បានចូលលេងក្នុងការប្រកួតមួយចំនួន ហើយការប្រកួតផ្សេងទៀតបានលេងដែរតែលេងអត់ពេញម៉ោង ពោលគឺត្រូវប្ដូរចេញមុនចប់ការប្រកួត។
អត្ថបទ៖ ថ្ងៃដំបូងនិងថ្ងៃចុងក្រោយរបស់លោក Sir Alex នៅ Old Trafford ខុសគ្នាប៉ុនណា?
សៀវភៅនោះក៏បានរំឭកអំពីបរាជ័យ០-២ក្រោមថ្វីជើងក្រុម Barcelona ក្នុងវគ្គផ្ដាច់ព្រ័ត្រ UEFA Champions League ឆ្នាំ២០០៩ ដោយលោក Sir Alex បានទម្លាក់កំហុសលើ Anderson និង Carlos Tevez ខ្លាំងជាងកីឡាករនានា ក្រោមសម្ដីនិយាយថា Anderson បោះបាល់ចេញបានតែ៣ជើងប៉ុណ្ណោះក្នុងតង់ទី១ ខណៈ Tevez ដែលត្រូវបានដាក់ឱ្យចូលលេងក្នុងតង់ទី២ លេងដើម្បីតែខ្លួនឯងជាលក្ខណៈបុគ្គល មិនបានគិតពីផលប្រយោជន៍ក្រុមទាំងមូលឡើយ។
ដោយឡែក លោក Sir Alex បានពណ៌នា Cristiano Ronaldo ដែលចាកចេញទៅរួមរស់ជាមួយ Real Madrid ក្នុងឆ្នាំ២០០៩ ថា ជាកីឡាករដ៏មានទេពកោសល្យពិសេសខ្ពស់ជាងគេបង្អស់ក្នុងចំណោមកីឡាករទាំងឡាយដែលលោកបានបង្វឹក និងថាពេលលោកមើល Ronaldo លេងលើកទី១ គឺជាពេលដែលលោកមានអារម្មណ៍រំភើបបំផុតក្នុងអាជីពដឹកនាំក្រុមបាល់ទាត់។
ពាក់ព័ន្ធទៅនឹងការងារនៅក្រុមជម្រើសជាតិវិញ លោក Sir Alex ទម្លាយអាថ៌កំបាំងថាសហព័ន្ធកីឡាបាល់ទាត់អង់គ្លេស (FA) បានទាក់ទងលោក២ដងឱ្យទៅធ្វើជាគ្រូបង្វឹកក្រុមជម្រើសជាតិអង់គ្លេស ដោយលើកទី១ក្នុងឆ្នាំ១៩៩៩ និងលើកទី២ក្នុងឆ្នាំ២០០១ ប៉ុន្តែលោកបដិសេធទាំងពីរដង។
ជាចុងក្រោយ នៅក្នុងសន្និសីទកាសែតសម្ពោធសៀវភៅស្វ័យជីវប្រវត្តិរបស់ខ្លួននោះ លោក Sir Alex បាននិយាយលើកទឹកចិត្តជាថ្មីម្ដងទៀតដល់អ្នកស្នងតំណែងរបស់ខ្លួន លោក David Moyes ដែលកំពុងដឹកនាំក្រុម Man Utd ចេញដេប៉ាក្នុងលីកកំពូលអង់គ្លេសយ៉ាងយ៉ាប់បំផុតពុំធ្លាប់ជួបប្រទះតាំងពីឆ្នាំ១៩៨៩មក។ លោក Sir Alex សង្កត់ធ្ងន់ថា៖ “តើអ្នកដឹងអ្វីខ្លះពី Man Utd ទេ? Man Utd គឺជាក្លិបតែមួយគត់នៅ Premier League ដែលអាចឈ្នះជើងឯកលីក ដោយដេញពិន្ទុពីក្រោយគេ! ជឿខ្ញុំទៅ! នៅពេលណាក្រុមចាប់ផ្ដើមទទួលបានលទ្ធផល អ្វីៗនឹងកាន់តែប្រសើរឡើងៗ ប្រៀបដូចដុំថ្មមូលធំមួយធ្លាក់ពីលើភ្នំមកអីចឹង គឺកាន់តែជក់ខ្យល់លឿនទៅៗ។ David Moyes ស្ថិតក្នុងស្ថានភាពល្អប្រសើរ ព្រោះយើងមានប្រព័ន្ធគាំទ្រដ៏អស្ចារ្យមួយ”។
អត្ថបទ៖ Moyes ប្រាប់ Kagawa ឱ្យបង្កើនសមត្ថភាពបន្ថែមទៀតបើសិនចង់ជាប់ជម្រើសដំបូងទៀងទាត់
ក្នុងរយៈពេលជាង២៦ឆ្នាំនៅ Old Trafford លោក Sir Alex នាំឱ្យ Man Utd ឈ្នះជើងឯកជាច្រើន រួមមាន ជើងឯក Premier League ១៣លើក FA Cup ៥លើក League Cup ៤លើក FA Community Shield ១០លើក UEFA Champions League ២លើក UEFA Cup Winners’ Cup ១លើក UEFA Super Cup ១លើក Intercontinental Cup ១លើក និង FIFA Club World Cup ១លើក៕
