ក្នុង​ពាន​រង្វាន់ UEFA Champions League វេលា​ម៉ោង​១:៤៥​នាទី​រំលង​អាធ្រាត្រ​នេះ ​ក្រុម​ Real Madrid ​របស់​លោក​ Carlo Ancelotti ​ត្រូវ​តតាំង​នឹង Juventus ​របស់​លោក ​Antonio Conte។ លោក ​Ancelotti ​ស្គាល់​បាល់​អ៊ីតាលី​ច្បាស់​​ណាស់​ពី​ព្រោះ​​កាល​នៅ​ជា​កីឡាករ​ ​លោក​លេង​នៅ​អ៊ីតាលី​តាំង​ពី​ដើម​ដល់​ចប់ ​ហើយ​ក៏​ធ្លាប់​ដឹក​នាំ​ក្រុម​នៅ​អ៊ីតាលី​ជា​ច្រើន​ដែរ ​ដូច​ជា​ Reggiana, Parma, Juventus និង AC Milan ​មុន​ផ្លោង​មក​ដល់​ Real Madrid បច្ចុប្បន្ន។ ​ដូច្នេះ ​តើ​ Real Madrid យប់​នេះ​​ធ្វើ​ក Juventus ​បាន​ឬ​ទេ?

អត្ថបទ​៖ ពូល F កាន់​តែ​តានតឹង​ក្រោយ​ Dortmund ស៊ី​ Arsenal, Napoli ស៊ី​ Marseille

ព័ត៌មាន​ជើង​កីឡាករ
​
Gareth Bale ​រង​របួស​ភ្លៅ​​ពេល​កម្ដៅ​សាច់ដុំ​ត្រៀម​ប្រកួត​ទល់​នឹង Getafe កាល​ពី​ថ្ងៃ​ទី​២២ កញ្ញា ប៉ុន្តែ​សប្ដាហ៍​មុន​ពេល​ Real Madrid ឈ្នះ Malaga ២-០ ​អតីត​សមាជិក​ក្រុម​ Spurs ​រូប​នេះ​បាន​ចូល​លេង​ចុង​ម៉ោង​ហើយ​រក​បាន​​បាល់​ពិន័យ​១១​ម៉ែត្រ​មួយ​គ្រាប់​ឱ្យ Ronaldo ​ជា​អ្នក​ស៊ុត។ ​នៅ​យប់​នេះ គេ​រំពឹង​ថា​​ខ្សែ​បម្រើ​ស្លាប​ជម្រើស​ជាតិ​វេល​វ័យ​២៤​ឆ្នាំ​ នឹង​មាន​ឱកាស​ចូល​លេង ទោះ​ជា​ Real ​ត្រូវ​ត្រៀម​កម្លាំង​ធ្វើ​ដំណើរ​ទៅ​ទឹកដី​ Barcelona ​នា​ថ្ងៃ​សៅរ៍​នេះ​ក៏​ដោយ។ ​ខ្សែ​ប្រយុទ្ធ Karim Benzema ខ្សែ​ការពារ​ Fábio Coentrão និង Raphaël Varane ​រំពឹង​ថា​ចូល​លេង​វិញ​បាន​ក្នុង​យប់​នេះ ប៉ុន្តែ​ខ្សែ​បម្រើ​ Xabi Alonso ​មិន​ទាន់​ជា​ពី​របួស​បាក់​ឆ្អឹង​ប្រអប់​ជើង​នៅ​ឡើយ​ទេ។

សម្រាប់​ Juventus ​ដែល​បណ្ដោយ​ឱ្យ​របូត​ការ​នាំ​មុខ​២-០​​ទៅ​ជា​បរាជ័យ ៤-២ នៅ​ទឹកដី ​Fiorentina ​កាល​ពី​ថ្ងៃ​អាទិត្យ ​នឹង​អវត្តមាន​តួ​សំខាន់​មួយ​ចំនួន​ដូច​ជា​ខ្សែ​ប្រយុទ្ធ ​Mirko Vučinić ​និង​ខ្សែ​ការពារ Stephan Lichtsteiner។ ​Fabio Quagliarella ក៏​អវត្តមាន​ដែរ ដោយសារ​របួស​ភ្លៅ។

អត្ថបទ​៖ Ronaldo ហ៊ែតទ្រីក​លើក​ទី​២១​នៅ Real ខណៈ Rooney ស៊ុត​គ្រាប់​ទី​២០០​នៅ Man Utd

រឿង​ខ្លះ​ៗ​ដែល​គួរ​ដឹង​រវាង​ក្រុម​ទាំង​ពីរ

ក្រុម​ទាំង​ពីរ​ធ្លាប់​ជួប​គ្នា​១៤​លើក​រួច​មក​ហើយ​ក្នុង​ពាន​រង្វាន់​ទ្វីប​អឺរ៉ុប (Champions League/Europa League) ​ហើយ​លទ្ធផល​មិន​ដែល​មាន​ស្មើ​ទេ ​មាន​តែ​ចាញ់​និង​ឈ្នះ​តែ​ម្ដង។ ជួប​គ្នា​៦​លើក​នៅ Bernabeu, Real ​ឈ្នះ​៤​ដង ចាញ់​២​ដង ខណៈ​ជំនួប​៦​លើក​នៅ​ដី​របស់​ Juventus ក្រុម​របស់​ប្រទេស​អ៊ីតាលី​មួយ​នេះ​ឈ្នះ​៥​ដង​ ចាញ់​តែ​ម្ដង​ប៉ុណ្ណោះ។​

Juventus ឈ្នះ​នៅ​ទឹកដី Real លើក​ចុងក្រោយ គឺ​កាល​ពី​ខែ​វិច្ឆិកា​ឆ្នាំ​២០០៨ កាលណោះ Juventus ឈ្នះ​២-០​ក្នុង​ការ​ប្រកួត​សន្សំ​ពិន្ទុ​តាម​ពូល។

យ៉ាង​ណា​ក្ដី Real Madrid មិន​ដែល​ចាញ់​ឡើយ​ក្នុង​ការ​ប្រកួត Champions League ក្នុង​ដី​ខ្លួន​ឯង​១៣​លើក​ចុង​ក្រោយ​នេះ ពោល​គឺ​ឈ្នះ​១១​លើក ស្មើ​២​លើក និង​ទាត់​បញ្ចូល​ទី​គេ​បាន​ដល់​ទៅ​៤៣​គ្រាប់។

ចំណែក Juventus វិញ លេង​​ Champions League ៤​ប្រកួត​ចុង​ក្រោយ មិន​ដែល​ឈ្នះ​សោះ បាន​ត្រឹម​តែ​ស្មើ​២ដង និង​ចាញ់​២​ដង។

២៧​ប្រកួត​ចុង​ក្រោយ​ក្នុង​ពាន​រង្វាន់ Champions League, Real Madrid តែងតែ​រក​គ្រាប់​បាល់​បញ្ចូល​ទី​គូ​ប្រកួត​បាន​ជានិច្ច។ លើស​ពី​នេះ ​ម្ចាស់​ជើងឯក Champions League ៩​សម័យ ​គឺ​ជា​ក្រុម​ដែល​ទទួល​ជ័យជម្នះ​ច្រើន​ជាង​គេ​បំផុត​ក្នុង​ពាន​រង្វាន់ Champions League និយាយ​ឱ្យ​ចំ​គឺ​ឈ្នះ​១០៧​ប្រកួត គិត​តាំង​ពី​រដូវ​កាល​១៩៩២-៩៣​មក។

Real Madrid ជា​ក្រុម​ដែល​រក​គ្រាប់​បាល់​បាន​ច្រើន​ជាង​គេ​ក្នុង​ពាន​រង្វាន់​ Champions League រដូវ​កាល​នេះ គឺ​ទាត់​ចូល​បាន​១០​គ្រាប់ ​ហើយ​៨​គ្រាប់​ក្នុង​ចំណោម​គ្រាប់​ទាំង​១០​នោះ​កើត​ឡើង​ក្នុង​តង់​ទី​២។

មាន​តែ​ Juventus (៥៣ដង) ប៉ុណ្ណោះ​ជា​ក្រុម​ដែល​មាន​ឱកាស​ស៊ុត​សំដៅ​ទី​គូ​ប្រកួត​បាន​ច្រើន​ជាង​ Real Madrid (៤១ដង) ​នៅ Champions League រដូវ​កាល​នេះ។​

Cristiano Ronaldo ​រក​គ្រាប់​បាល់​បញ្ចូល​ទី​បាន​២៦​គ្រាប់​ក្នុង​ការ​បង្ហាញ​ខ្លួន​២១​លើក​ចុង​ក្រោយ​ក្នុង​ពាន​រង្វាន់​ Champions League។ ​ហើយ​បច្ចុប្បន្ន​គេ​កំពុង​ឈរ​លើ​គេ​ក្នុង​បញ្ជី​អ្នក​ទាត់​បញ្ចូល​ទី​បាន​ច្រើន​ជាង​គេ គឺ​ពីរ​ប្រកួត​កន្លង​មក​នេះ គេ​ស៊ុត​បញ្ចូល​ទី​បាន​ដល់​ទៅ​៥​គ្រាប់។​

Andrea Pirlo មិន​ដែល​ទាត់​ចូល​ឡើយ​ក្នុង​ការ​លេង Champions League ២២​លើក​ចុង​ក្រោយ។​

អត្ថបទ​៖ UEFA ​ដាក់​បម្រាម​ក្លិប​របស់​ទួរគី​២​មិន​ឱ្យ​ចូល​លេង​ UCL និង UEL ​ពី​បទ​រៀប​ចំ​លទ្ធផល

៥​ប្រកួត​ចុង​ក្រោយ​របស់ Real Madrid ៥​ប្រកួត​ចុង​ក្រោយ​របស់​ Juventus
២៥/០៩/១៣ Elche ១-២ Real Madrid (La Liga) ២៥/០៩/១៣ Chievo ១-២ Juventus (Serie A)
២៨/០៩/១៣ Real Madrid ០-១ At Madrid (La Liga) ២៩/០៩/១៣ Torino ០-១ Juventus (Serie A)
០២/១០/១៣ Real Madrid ៤-០ Copenhagen (UCL) ០២/១០/១៣ Juventus ២-២ Galatasaray (UCL)
០៥/១០/១៣ Levante ២-៣ Real Madrid (La Liga) ០៦/១០/១៣ Juventus ៣-២ AC Milan (Serie A)
១៩/១០/១៣ Real Madrid ២-០ Malaga (La Liga) ២០/១០/១៣ Fiorentina ៤-២ Juventus (Serie A)
ប្រវត្តិ​ជួប​គ្នា​៦​លើក​ចុង​ក្រោយ
០៥/១១/០៨ Real Madrid ០-២ Juventus

២១/១០/០៨ Juventus ២-១ Real Madrid

០៩/០៣/០៥ Juventus ២-០ Real Madrid

២២/០២/០៥ Real Madrid ១-០ Juventus

១៤/០៥/០៣ Juventus ៣-១ Real Madrid

០៦/០៥/០៣ Real Madrid ២-១ Juventus
ព្យាករណ៍​របស់​ Sabay ចំពោះ​គូ​នេះ​គឺ​៖​ Real Madrid ២-១ Juventus