ម្ដាយអ្នកលេងតេក្វាន់ដូត្រកូល ស៊ន និយាយពីការជំរុញឲ្យកូនៗដល់កម្រិតកំពូល
អ្នកលេងតេក្វាន់ជម្រើសជាតិត្រកូល ស៊ន បីនាក់គឺកីឡាករ ស៊ន អេលីត កីឡាការិនី ស៊ន ដាវីន និង ស៊ន សៀវម៉ី សុទ្ធតែជាបុគ្គលឆ្នើមធ្លាប់យកមេដាយស៊ីហ្គេមមកឲ្យកម្ពុជានាពេលកន្លងមក។ ទំព័រនេះយើងខ្ញុំសូមនាំមិត្តអានទៅជួបអ៊ុំស្រី សួន ចន្ធី ដែលត្រូវជាម្ដាយរបស់អ្នកលេងតេក្វាន់ដូមានឈ្មោះបោះសំឡេងទាំង៣នាក់ ថាតើគាត់បានជំរុញដូចម្ដេចខ្លះដល់កូនៗ ដែលកំពុងជាទ័ពស្រួចសម្រាប់កីឡាកម្ពុជា?
ស្ត្រីវ័យ៥៤ឆ្នាំឲ្យដឹងថាគាត់តែដាស់តឿនកូនៗគាត់ថា កាលដែលដាក់ខ្លួនជាអ្នកកីឡាហើយ ត្រូវប្រឹងប្រែងឲ្យអស់សមត្ថភាពដណ្ដើមមេដាយមកឲ្យជាតិ។ អ៊ុំស្រីពន្យល់ថា៖ “ខ្ញុំគាំទ្រពួកគេ ហើយខ្ញុំតែងក្រើនរំលឹកឲ្យពួកគេព្យាយាម គឺថាបើជ្រុលលូកពាងប្រហុកហើយ ត្រូវលូកឲ្យកប់ដៃ កុំរារែកចិត្ត។ ការប្រកួតនៅបរទេសគឺជារឿងធំណាស់ ព្រោះជាមុខមាត់ប្រទេសជាតិ មុខមាត់ខ្មែរទាំងមូល មិនអាចលេងសើចទេ”។
ប្រភពថាកាលដំបូងឡើយ គាត់បានហាមឃាត់កូនស្រីរបស់គាត់គឺ ស៊ន ដាវីន និងស៊ន សៀវម៉ី មិនឲ្យប្រឡូកកីឡាហក់លោតដូចជាតេក្វាន់ដូនេះទេ លើកលែងតែ ស៊ន អេលីត ដែលមិនជាបញ្ហាព្រោះជាប្រុស។ ប៉ុន្តែគាត់បែរជាមិនរារាំងនិងថែមទាំងជំរុញទៀត នៅពេលដែលកូនៗរបស់គាត់ចង់ចាប់យកកីឡានេះ ពិសេសនៅពេលដែលកូនៗរបស់គាត់តែងជោគជ័យ។
អត្ថបទពាក់ព័ន្ធសូមអាន៖ ដឹងថាអ្នកលេងតេក្វាន់ដូត្រកូល ស៊ន មានតួនាទីជាអ្វីទេ?
ពីឆ្វេង ដាវីន, អេលីត និង សៀវម៉ី
ទន្ទឹមនឹងនេះអ៊ុំស្រី សួន ចន្ធី ថា គ្រួសារគាត់រំភើបនិងមានមោទនភាពណាស់ ដែលកូនរបស់គាត់ទាំង៣នាក់ខាងលើសុទ្ធតែធ្លាប់យកមេដាយពីកម្មវិធីអន្តរជាតិ ពិសេសស៊ីហ្គេម មកឲ្យកម្ពុជា។ គាត់ឲ្យដឹងទៀតថា សាច់ញាតិនិងអ្នកជិតខាងមិនត្រឹមតែមិនដែលច្រាសឆ្អេះថាស្រីទៅហ្វឹកហាត់កីឡាមិនសមឡើយ តែថែមទាំងស្ញប់ស្ញែងដែលពួកគេតែងបង្កើតជោគជ័យនៅអន្តរជាតិ។ គាត់បន្តពន្យល់៖ “ការបានមេដាយ មិនមែនសំខាន់តែយើងបានប្រាក់រង្វាន់នោះទេ តែជាចំណែកធ្វើឲ្យមុខមាត់ខ្មែរលេចឡើងនៅអន្តរជាតិ។ អ្នកក្បែរខាងសរសើរពួកគេ ព្រោះពួកគេជួយខ្ញុំច្រើន ព្រោះកាលពីមុនជីវិតគ្រួសារខ្ញុំគឺតស៊ូលំបាកណាស់មុនធូរស្បើយដូចសព្វថ្ងៃ”។
យ៉ាងណាក្ដីប្រភពថា គាត់ព្រួយបារម្ភណាស់ដែរ រាល់ពេល ស៊ន ដាវីន, ស៊ន សៀវម៉ី ឬ ស៊ន អេលីត ចេញទៅប្រកួតនៅក្រៅស្រុកម្ដងៗ។ គាត់ថាប្រសិនបើកូនៗគាត់ប្រកួតចាញ់ មិនបានមេដាយគឺប៉ះពាល់ដល់មុខមាត់ប្រទេសទាំងមូល។ អ៊ុំស្រីបន្តបង្ហាញចំណាប់អារម្មណ៍៖ “យើងទៅតំណាងឲ្យខ្មែរមួយប្រទេស បើយើងទៅមិនបានមេដាយ វាមិនល្អដែរ ព្រោះយើងទៅអន់ៗឲ្យតែគេខកចិត្ត”។
ស៊ន ដាវីន (ខៀវ) ការប្រកួតជាមួយម្ចាសមេដាយ អូឡាំពិក Maria del Rosario Espinoza របស់ម៉ិកស៊ិចកូ (រូបថតពី Zimbo)
បច្ចុប្បន្ន ស៊ន ដាវីន កំពុងសំងំហ្វឹកហាត់តេក្វាន់ដូនៅប្រទេសកូរ៉េខាងត្បូង ខណៈដែលប្អូនស្រីនាងគឺ ស៊ន សៀវម៉ី បានចេញដំណើរទៅហ្វឹកហ្វឺនទីនោះដែរកាលពីថ្មីៗនេះ។ រីឯ ស៊ន អេលីត កំពុងលត់ដំជាប្រចាំក្នុងស្រុក ដើម្បីត្រៀមឆ្ពោះទៅ ស៊ីហ្គេម ខែធ្នូខាងមុខ ខណៈដែលស៊ីហ្គេម២០១១ បេក្ខជនឆ្នើមទាំង៣រូបនេះសុទ្ធតែយកបានមេដាយមកមាតុភូមិបានដូចគ្នា ពោល ដាវីន និង សៀវម៉ី ឈ្នះផ្នែកតេក្វាន់ដូ ហើយ ស៊ន អេលីត ឈ្នះផ្នែកវ៉ូវីណាម មុនប្ដូរមកលេងតេក្វាន់ដូវិញសម្រាប់ស៊ីហ្គេមឆ្នាំនេះ៕
អត្ថបទ៖ ប៉ែន សុផាន់ណា
