ខ្មែរនៅបារាំងម្នាក់ចងកសម្លាប់ខ្លួនតាំងពី៨ឆ្នាំមុន ទើបរកឃើញសព
សពបុរសអាណិកជនខ្មែរម្នាក់នៅបារាំង ទើបត្រូវបានរកឃើញកាលពីថ្ងៃសុក្រ សប្ដាហ៍មុន បន្ទាប់ពីបាត់ខ្លួនអស់រយៈពេល ៨ឆ្នាំកន្លងទៅនេះ។
លោក ថូម៉ាស ងិន (Thomas Ngin) ជាជនជាតិខ្មែរដែលមានវ័យ ៥០ឆ្នាំ គិតមកដល់ឆ្នាំ២០១៣ នេះ ត្រូវបានប៉ូលិសសន្និដ្ឋានថា បានចងកសម្លាប់ខ្លួននៅផ្ទះល្វែងមួយកន្លែងស្ថិតនៅទីក្រុងប៉ារីស បន្ទាប់ពីរូបគាត់បាត់បង់ការងារជាសន្តិសុខកាលពីឆ្នាំ២០០៥។
ផ្ទះល្វែងដែលលោក Thomas Nginស្នាក់នៅ
សូមចុចអាន៖ យុវតីខ្មែរពីរនាក់ត្រូវបានរំដោះពីផ្ទះបននៅម៉ាឡេស៊ី
សាកសពលោក ងិន ដែលនៅសល់តែឆ្អឹងនោះត្រូវបានប្រទះឃើញចងកសម្លាប់ខ្លួនទៅនឹងគ្រែពូករបស់គាត់ដោយអ្នកចំណូលថ្មីដែលទើបមកទិញផ្ទះល្វែងដែលលោករស់នៅ បន្ទាប់ពីអាណិកជនខ្មែរម្នាក់នេះ បានចាក់សោទ្វាចោលអស់រយៈពេល ៨ឆ្នាំដោយគ្មានដំណឹង។
តាមប្រភពបានបញ្ជាក់ដែរថា លោក ងិន បានជំពាក់លុយធនាគារ ហើយក្រោយមកធនាគារក៏បានរឹបអុសយកផ្ទះរបស់គាត់ ហើយក៏បានលក់ទៅឱ្យម្ចាស់ថ្មីមួយទៀតកាលពីខែមុន។
យោងតាមរបាយការណ៍ពីសារព័ត៌មានវិទ្យុបារាំងអន្តរជាតិបានបញ្ជាក់ថា លោក Ngin បានកាត់ផ្ដាច់ទំនាក់ទំនងជាមួយគ្រួសាររបស់គាត់ ហើយសាច់ញាតិរបស់គាត់ក៏មិនបានផ្ដល់ដំណឹងណាមួយពីការបាត់ខ្លួននោះឡើយ ដែលនេះជាមូលហេតុមួយធ្វើឲ្យបុរសអាណិកជនខ្មែរខាងលើស្លាប់ទៅអស់រយៈពេល៨ឆ្នាំ ដោយគ្មានអ្នកណាដឹង។
សូមចុចអាន៖ អាកាសយានដ្ឋាន ធំបំផុតទាំង៥
ការស្លាប់របស់លោក Ngin គឺជាដំណឹងដ៏គួរឲ្យភ្ញាក់ផ្អើលមួយ និងជារឿងមួយមិនគួរឲ្យជឿទាល់តែសោះដែលអាណិកជនខ្មែរម្នាក់នេះស្លាប់ដោយអាថ៌កំបាំងអស់រយៈ ពេល ៨ឆ្នាំដោយគ្មានអ្នកណាដឹងក្នុងទីក្រុងមួយដ៏ស៊ីវីល័យ ដែលមានមនុស្សម្នារស់នៅកុះករ៕
