ក្រុមយុវជន៣២ក្រុមនឹងបើកការប្រកួតហ្វូតសាតថ្នាក់ជាតិសប្ដាហ៍ក្រោយ
ការប្រកួតបាល់ទាត់ហ្វូតសាលថ្នាក់ជាតិដែលបានខកខានរៀបចំ២ឆ្នាំចុងក្រោយមកនេះ នឹងវិលមកវិញដែលការប្រកួតនឹងចាប់ផ្ដើមពីថ្ងៃទី២៨តុលាដល់ថ្ងៃទី២វិច្ឆិកា២០១៣នៅ សាលកីឡា Beeline Arena ក្រោមការគាំទ្រពីក្រុមហ៊ុនស្រាបៀ Tiger គឺការប្រកួត Tiger National Futsal Championship 2013។
ក្រុមយុវជនដែលមានអាយុចាប់ពី១៨ឆ្នាំឡើងសរុប ៣២ក្រុមនឹងត្រូវបែងចែកជា៨ពូលដើម្បីលេងវិលជុំតាមពូល។ ក្រោយចប់វិលជុំ ក្រុមដែលមានពិន្ទុច្រើនជាងគេបង្អស់តាមពូលនីមួយៗនឹងឡើងទៅចាប់ឆ្នោតជ្រើសរើសគូលេង Playoff។
លោក ម៉ៃ តុលា អគ្គលេខាធិការរងសហព័ន្ធកីឡាបាល់ទាត់កម្ពុជាថា បាល់ទាត់ហ្វូតសាល មានប្រជាប្រិយភាពខ្លាំងទាំងនៅ កម្ពុជា តំបន់អាស៊ាន រួមនឹងទូទាំងពិភពលោកផងដែរ។ លោកថានៅរាជធានីភ្នំពេញនិងបណ្ដាខេត្តបច្ចុប្បន្ននេះ មានទីលានបាល់ទាត់ហ្វូតសាលតូចៗរីកស្គុះស្គាយនិងទទួលបានការពេញនិយមលេងកាន់តែច្រើនឡើងៗ។ លោកអគ្គលេខាធិការរងបន្ថែម៖ “យើងឃើញថាយុវជនពេញនិយមលេងណាស់ តែដោយសារបញ្ហាហិរញ្ញវត្ថុទើបយើងអាក់ខានមិនបានរៀបចំកន្លងមកនេះ។ មកដល់ពេលនេះទើបក្រុមហ៊ុនស្រាបៀ Tiger និងដៃគូសហការបានគាំទ្រការប្រកួតនេះឲ្យលេចខ្លួនមកវិញ ហើយខ្ញុំជួសមុខឲ្យឯកឧត្ដម សៅ សុខា ប្រធានសហព័ន្ធសូមអគុណដល់ការគាំទ្រនេះ”។
ដោយឡែកលោក Roland Bala ប្រធានគ្រប់គ្រងទូទៅក្រុមហ៊ុនស្រាបៀ Tiger បានរំលឹកថាកាលដើមឆ្នាំ ក្រុមហ៊ុនមួយនេះ បាននាំការប្រកួតហ្វូតសាលដ៏រំភើបមួយ Tiger Street Football និងទទួលបានការស្វាគមន៍ពេញទំហឹងពីយុវជនកម្ពុជា។ ភាពជោគជ័យនៃរៀបចំ Tiger Street Football បានជំរុញឲ្យក្រុមហ៊ុនដដែលចូលខ្លួនមកគាំទ្រការប្រកួតដែលនឹងចូលមកដល់នៅសប្ដាហ៍ក្រោយនេះ។ “ បាល់ទាត់ហ្វូតសាល មានការរីកចម្រើននិងជាទីពេញនិយមក្នុងស្រទាប់យុវជនកម្ពុជាហើយក្រុមហ៊ុនស្រាបៀ Tiger មានមោទនភាពចំពោះការសហការអភិវឌ្ឍវិស័យ បាល់ទាត់ហ្វូតសាលនៅកម្ពុជា”។ លោក Roland បន្ថែមពំនោល។
ពាក់ព័ន្ធនឹងប្រាក់រង្វាន់ក្រុមជើងឯកនឹងទទួលបាន ២៥០០ដុល្លារអាមេរិក ក្រុមជើងឯករងបាន ១០០០ដុល្លារ និងក្រុមលេខ៣ទទួល ៥០០ដុល្លារអាមេរិក។
លោក Roland Bala (អាវស) ជាមួយលោក ម៉ៃ តុលា ក្នុងសន្និសីទ ប្រកាសការប្រកួតព្រឹកមិញ
ការជម្រុះតាមពូលទាំង៨នឹងធ្វើឡើងចាប់ពីថ្ងៃទី២៨តុលាដល់ថ្ងៃទី២៨តុលាតទៅ ដោយចាប់ផ្ដើមពីម៉ោង ១៣:០០ដល់ម៉ោង១៧:០០ ហើយការចូលរួមទស្សនាគឺសេរីនៅ Beeline Arena ខាងកើតស្ពានជ្រោយចង្វា។ ដោយឡែកនៅការប្រកួតវគ្គពាក់កណ្ដាលផ្ដាច់ព្រ័ត្រ និងផ្ដាច់ព្រ័ត្រនៅថ្ងៃទី២វិច្ឆិកានឹងមានផ្សាយផ្ទាល់តាមទូរទ្សន៍ MyTv ផងដែរ៕
